Mitentina 110 Tapitrisa dolara ny vola omen’ireo mpamatsy vola hanatanterahana ny tetikasa GRACIR. Tokantrano miisa 300.000 no hahazo tohana ara-pambolena amin’ny alalan’io tetikasa io.
Fanampiana tokantrano miisa 300.000
Tokantrano miisa 300.000 na olona 1,7 tapitrisa no hisitrika ny asa kasaina hatao ao anatin’ny tetikasa GRACIR (Gestion des Risques Agricoles pour la Croissance Inclusive et la Résilience). Amin’ireo mahazo tombony dia tokony ho 40% farafahakeliny ny vehivavy, 45% ny tanora manana solontena mitovy amin’ny zatovolahy sy zatovovavy.
Araka ny nambaran’i Hervé Patrick Radavidson, mpandrindra ankapoben’ny tetikasa sy ny fiaraha-miasa eo anivon’ny minisiteran’ny Fambolena sy ny Fiompiana, dia “tafiditra ao anatin’ny asa ataon’i Fanjakana malagasy amin’ny fampidirana bebe kokoa ny sehatry ny fambolena ao anatin’ny tsena eo anivon’ny firenena sy iraisampirenena mba hiantohana ny fanjarian-tsakafo”.
Hampihena ny risika amin’ny fambolena sy hanatsara ny fampiasam-bola amin’ny sehatry ny fambolena ity tetikasa ity.
Hanampy ny tantsaha amin’ny fahavitan-tena ara-tsakafo
Manamora ny fahafahan’ireo mpamboly mamokatra sy manatratra ny fahavitan-tena ara-tsakafo ny tetikasa GRACIR Manao izay ahazoana antoka ny tsena sy ny fifaninanana ara-barotra. Mametraka tontolo ahafahan’ny mpampiasa vola mampiasa ny volany.
Nampahafantarina tamin’ny fomba ofisialy tamin’ireo mpamatsy vola ny tetikasa GRACIR izay nataon’ny PARM (Platform for Agricultural Risk Management), ny Minisiteran’ny Fambolena sy ny fiompiana ary ny minisiteran’ny Toekarena sy ny Vola nandritra ny latabatra boribory nokarakaraina ny Alakamisy 27 febroary lasa teo. Nisy ny fampahafantarana ireo asa hotanterahina sy ny tanjon’izy ireo amin’ny fampiasana ny vola ho fanatanterahana ny tetikasa. Mitentina 110 tapitrisa dolara amerikana, ny tetikasa GRACIR.
Efa nankatoavin’ny fanjakana tamin’ny taona 2024 ity tetikasa ity, efa nahazo fanamafisana ny famatsiam-bola avy amin’ireo mpiara-miombon’antoka ara-teknika sy ara-bola sasany, toy ny Banky Arabo ho an’ny fampandrosoana afrikanina (BADEA) sy ny Tahirim-bola iraisam-pirenena ho an’ny fampandrosoana ny fambolena (FIDA). Ireo mpamatsy vola hafa koa dia naneho ny fahalianany amin’ny fanohanana ny asa sasany amin’ny tetikasa nandritra ny dinika nifanaovana tamin’ny PARM sy ny FIDA.
“Mitohy hatrany ny fanentanana ny mpiara-miombon’antoka rehetra hanatratra na hihoatra ny vinavinan’ny famatsiam-bola nokasaina ho an’ity tetikasa GRACIR ity”, hoy i Joseph Rostand Olinga Biwole, talen’ny FIDA eto Madagasikara.
Natao hiadiana amin’ny fahantrana sy ny tsy fanjarian-tsakafo any ambanivohitra ary hanamafisana ny mety ho fitomboan’ny rojom-pambolena stratejika ity tetikasa ity. Ny GRACIR dia novolavolaina taorian’ny fanadihadiana nataon’ny PARM teto amintsika mba hampihenana ny risika amin’ny fambolena sy hanatsarana ny fampiasam-bola ataon’ny Fanjakana sy ny tsy miankina amin’ny sehatry ny fambolena. Ny asa atao ao anatin’ny fanatanterahana izany dia kasaina “hifantoka amin’ny faritra telo manana hery ara-pambolena matanjaka nefa tena iharan’ny loza ara-pambolena ary tena ahitana apahany betsaka amin’ny tsy fanjarian-tsakafo”, araka ny fampahatsiahivan’i John Ramamonjisoa, Mpiandraikitra ny PARM eto Madagasikara. Anisan’izany ny faritra Afovoantany sy Atsimo ary Amoron’i Mania.
Toria Dimbiniaina
